Partizani padyshim që është pretendent për titullin kampion, veçse deri tani ka luajtur vetëm nga një pjesë loje në çdo ndeshje, ose edhe më pak. Aq bëri ndaj Kamzës, kur u “zgjua” pas pushimit, luajti vetëm minutat e fundit në Korçë, ndërsa kundër Kastriotit nderoi në 45 minutat e para. Ia doli të fitonte me golin e Jasir Asanit në minutën e 13-të, mund të kishte shënuar gol tjetër në fraksionin e parë të lojës, por u rrezikua në momentet përmbyllëse.

“Nuk dua ta shoh më pjesën e dytë, – u shpreh trajneri Skënder Gega pas takimit të javës së tretë të Superligës, – pati edhe lodhje”. Tifozët mbetën të pakënaqur, dhe njëri prej tyre postoi një koment në faqen zyrtare të klubit në FB: “Kur shënoni vetëm 1 gol me Kastriotin, si do t’ia bëni me ekipe më të fortë?”

Gjithsesi, Partizani është në vend të tretë, me 6 pikë, vetëm një më pak sesa kryesuesit Skënderbeu e Flamurtari, dhe vetëm Kamza mund t’ia rrezikojë pozicionin nëse fiton ndeshjen e saj.

Sfidanti.al