Viti 2013 ishte krejt tjetër gjë. Bajerni i asaj kohe shkoi drejt titullit europian pas triumfit të jashtëzakonshëm të Barcelonës, 7-0 në të dyja ndeshjet çerekfinale, ndërsa këtë herë ndaj Seviljes, u duk shumë larg atyre kohëve. Edhe pse në fushë ishin disa nga heronjtë e asaj epoke, si Roben, Riberi apo Tomas Myler, dhe në stol i njëjti trajner, Jup Hajnkes, skuadra bavareze ishte e lodhur.
U mjaftua me një barazim pa gola në “Alianc Arena” të Mynihut dhe kaloi në gjysmëfinale falë suksesit 2-1 në Spanjë, ku gjithashtu nuk bindi plotësisht. Sevilja luftoi fort dhe ishte thuajse e barabartë me kampionët e sapokurorëzuar të Gjermanisë. Bajerni nuk është se nuk e provoi, veçse nuk e pati shkëlqimin e pritshëm. Ndoshta, ndikoi fitimi i parakohshëm i titullit në Bundesligë dhe festa, sado e vogël, më pas.
Gjithsesi, trajneri Hajnkes, nuk pati asnjë shenjë pakënaqësie. “Ne luftuam fort dhe nuk pësuam gol, – tha ai, – diçka që më bëri shumë të lumtur, pasi e kam kërkuar gjithnjë nga skuadra që të mos pësojë gola në ndeshje të tilla. Sevilja luajti shumë mirë dhe tregoi se është ekip i fortë. Barazimi na mjaftonte dhe ne ruajtëm gjakftohtësinë”.
Çfarë shorti do të preferonte Hajnkesi? “Përsa i përket shortit, nuk kam asnjë preferencë, pasi në gjysmëfinale ka vetëm skuadra të forta, – deklaroi ai, – Ju e patë se çfarë ndodhi me Barcelonën, pra nuk mund të bësh asnjë nënvleftësim. Pavarësisht shortit, synimi ynë është i qartë, të arrijmë finalen, pra duhet të përballojmë çdo sfidë”.
Edhe presidenti Uli Hënes u shpreh i kënaqur me mënyrën sesi shkuan gjërat. “Duhet të jemi krenarë për ekipin që e meritoi plotësisht kualifikimin, – tha ai, – ju e patë se çfarë ndodhi në Romë dhe në Madrid, ndaj ishte e rëndësishme të mos ndërmerrnim aventura. Ndonjëherë mjafton edhe një rezultat 0-0, dhe skuadra u tregua shumë profesioniste me mënyrën sesi luajti”.
Gjysmëfinalet do të jenë një pengesë tjetër, edhe më e madhe sesa raundi që sapo kaloi, por Bajerni beson se është gati. Që pas rikthimit të Jup Hajnkesit në stol, optimizmi është maksimal, që do të arrihet triumfi i madh i vitit 2013, kur u fitua edhe Bundesliga, edhe Kupa e Gjermanisë, edhe Championsi.
Sfidanti.al
