Një shqiptar në Premier Ligën e Rusisë, Bernard Berisha “e lag” me gol!

Ishte harruar pasi kishte një vit pa ia dalë. Bernard Berisha është vërtet një lojtar ofensiv, por këto kohë nuk kishte pasur shumë fat. Gjithsesi, ish-sulmuesi i Skënderbeut ia doli që ta shënonte më në fund një gol, ndërsa luan në një nga kampionatet më të izoluar, e ndoshta më të paragjykuar të botës, në Premier Ligën e Rusisë. Berisha shënoi për Ahmatin e Groznit, në ndeshjen e javës së 27-të ndaj CSKA-së së Moskës, luajtur në shtëpi. Ai hyri si zëvendësues, dhe realizoi vetëm në fund, por sidoqoftë goli mbetet gol.

Menjëherë pas tij, ai rrëmbeu topin dhe e futi poshtë fanelës duke ia dedikuar gjithçka gruas së tij, që mesa duket pret një fëmijë. Ky ishte goli i parë në kampionat për futbollistin 30-vjeçar që ka luajtur në Superligën shqiptare edhe për Besën e Kavajës, ndërsa ka qenë edhe në radhët e përfaqësueses së Kosovës. Ahmati i Groznit është në pozicion komod në renditjen e Premier Ligës ruse, duke qenë në vend të 8-të me 35 pikë, e praktikisht duke mos e rrezikuar vendin në kategori. Berisha luan për ekipin e Republikës së Çeçenisë që nga viti 2017, ndërsa në të kaluarën tek Ahmati i Groznit kanë qenë edhe lojtarët e kombëtares shqiptare, Bekim Balaj dhe Odise Roshi.

Sfidanti.al