Kur je keq, detyrohesh të hysh edhe në borxh që të dalësh nga “balta”. Në “Kamp Nou” po mendojnë pikërisht kështu, ndonëse qendrimi i presidentit Bartomeu të paktën deri në mars prish jo pak punë. Gjithsesi, në klub po mendojnë për përforcimet dhe njëri prej tyre lidhet direkt me trajnerin e ri, Ronald Kuman. Ky është lojtari i Ajaksit dhe i Holandës, Donald “Doni” Van de Bek, i cili ishte i lidhur më parë me Realin. Barcelona po mendon edhe për mbrojtësin Malang Sarr, ish-lojtar i Nisës, që mund të vijë me parametër zero, për të forcuar një repart që u tregua katastrofik ndaj Bajernit në Champions. Sarrin e do edhe Arsenali. Ndërkaq, Barça ka menduar gjithnjë për Lautaro Martinezin dhe Nejmarin. Për këtë të fundit, mund të jepen 60 milionë euro plus kartoni i Antuan Grizmanit, gjithnjë nëse Paris SG është dakord. Jo të gjitha këto përforcime do të vijnë në “Kamp Nou”, por Kumani e di se skuadra katalanase ka nevojë për “gjak të ri” që të kthehet tek suksesi.

Sfidanti.al