Marrëdhënia mes ish-futbollistit brazilian Dani Alves dhe modeles spanjolle Joana Sanz ka marrë fund pas nëntë vitesh së bashku. Çifti, që ka edhe një vajzë, Julieta, ka nisur procedurat e divorcit, ndërsa vendimi për ndarjen lidhet me ndryshimet në jetën e ish-mbrojtësit të Barcelonës dhe përkushtimin e tij të fundit ndaj fesë.
Lajmi është bërë i ditur nga gazetari Javi Hoyos përmes rrjeteve sociale, pasi ka kontaktuar drejtpërdrejt me modelen 34-vjeçare. Sipas tij, një nga arsyet kryesore të krisjes së marrëdhënies është angazhimi gjithnjë e më i madh i Alves-it, 43 vjeç, në besimin ungjillor. Ish-futbollisti është përfshirë në aktivitete fetare si predikues dhe orator, duke zhvilluar edhe një tur ndërkombëtar.
Ky angazhim i ri thuhet se ka krijuar distancë mes tij dhe familjes. Sipas versionit të përcjellë nga Joana Sanz, problemi nuk lidhet me faktin që Alves ka zgjedhur besimin fetar, pasi ajo e kupton dhe e respekton këtë vendim, por me intensitetin e përkushtimit të tij dhe ndikimin që ka pasur në jetën familjare.
