Kur sezoni futbollistik po shkon drejt fundit, finalja e së shtunës në Champions League mes Arsenalit dhe Paris Saint-Germain premton spektakël, por edhe vë në pah lodhjen ekstreme të skuadrave elitare europiane. Përballja në “Puskas Arena” të Budapestit do të jetë ndeshja e 63-të sezonale për Arsenalin, skuadër që deri në fillim të prillit ishte ende në garë për katër trofe. Nga ana tjetër, PSG ka zhvilluar 56 ndeshje gjatë këtij sezoni, pa llogaritur shtatë takimet e Kupës së Botës për Klube verën e kaluar.

Megjithatë, edhe pse francezët kanë luajtur më pak ndeshje, rruga e tyre drejt finales ka qenë më e gjatë në Champions League. PSG ka zhvilluar 16 ndeshje europiane për të arritur deri këtu, përfshirë edhe fazën “play-off” ndaj Monacos. Arsenali, ndërkohë, ka luajtur 14 ndeshje në kompeticion.

Një nga diferencat më të mëdha mes dy skuadrave ka qenë menaxhimi i lojtarëve. Trajneri i PSG-së, Luis Enrique, ka pushuar shpesh yjet e tij në Ligue 1, falë dominimit në kampionatin francez dhe thellësisë së jashtëzakonshme të skuadrës, të ndërtuar me mbështetjen financiare të pronarëve nga Katari.

Në kontrast, formacioni bazë i Arsenalit ka mbajtur ngarkesë shumë më të madhe. Sipas statistikave, 11-shja titullare e përdorur nga Mikel Arteta në gjysmëfinalen e kthimit kishte grumbulluar plot 6,726 minuta më shumë aktivizim në kampionat krahasuar me PSG-në. Me Kupën e Botës që afrohet dhe kalendarin gjithnjë e më të ngjeshur, finalja e Champions League nuk do të jetë vetëm një duel për trofeun më të madh europian për klube, por edhe një provë e fundit fizike për lojtarët më të mirë të kontinentit.

sfidanti.al