Duke folur në podcast-in ‘Vamo a Calmarno’, ish-lojtari i Ternana, Fiorentina, Lazio, Inter, Parma e Cesena, Luis Jimenez, ka zbuluar prapaskena shqetësuese nga karriera e tij në Itali, duke përmendur ndeshje të manipuluara dhe të trukuara. “Kam luajtur të paktën tre ndeshje të manipuluara. Kjo ka ndodhur në Itali, por nuk mund t’ju them me cilën skuadër. Diçka e tillë nuk më ka ndodhur kurrë në Kili – akuzon ish-futbollisti kilian -. Në Itali, përkundrazi, kishte shumë ndeshje të trukuara dhe shumë mafie. Sot kjo është më pak e zakonshme, pasi shumë ish-futbollistë dhe drejtues janë ndëshkuar dhe nuk punojnë më në futboll. Për mua ishte vërtet e rëndë: isha në fillimet e mia dhe doja të arrija majat e futbollit italian”.
Jimenez, i cili ka luajtur në Itali për plot 9 sezone, zbulon detaje të tjera: “Në atë kohë luaja me Ternanën. Njëherë shënova pasi hyra nga stoli dhe portieri im deshi të më vriste. Kishte një marrëveshje për barazim, që do të thoshte se skuadra tjetër duhej të shënonte me çdo kusht dhe kishte shumë pak kohë për të nxjerrë rezultatin 1-1. Ai nuk luante shpesh dhe donte një barazim pa gola. Unë nuk e dija këtë, ishte një nga ndeshjet e mia të para në Itali. Doja të jepja maksimumin dhe më thanë për këtë vetëm pas ndeshjes”. Ish-mesfushori kilian, sot 40 vjeç, përmend gjithashtu Atalantën: “Një ndeshje tjetër ishte mes nesh dhe Atalantës në 2004, një përballje mes të parëve dhe të dytëve në renditje, dhe kishte festë mes tifozerive miqësore. Unë fitova një penallti dhe pashë që të gjithë ishin të dëshpëruar, madje edhe shoku im që e realizoi penalltinë vuri duart në fytyrë pa festuar. Qëndrova jashtë fushe sepse më kishin goditur fort dhe doktori më shpjegoi se ishte një ndeshje e manipuluar, nuk duhej të hyhej më në zonën e penalltisë. Askush nuk më kishte folur dhe unë u thashë: të paktën më paralajmëroni herën tjetër”. Ndeshja për të cilën Jimenez duket se po flet është Atalanta-Ternana 1-1, e luajtur më 21 dhjetor 2003 në Serie B: avantazhi i Ternanës me penallti nga Zampagna në minutën e 87′ dhe barazimi nga Budan dy minuta më vonë. Deklaratat e rënda të Jimenez mbeten për t’u verifikuar, por mund të përfundojnë në tryezën e drejtësisë sportive dhe të hapin një kapitull të ri në skandalet e basteve në futboll.
sfidanti.al
