Milionat janë ato që bien në sy së pari. Flasim për 200 milionë euro rrogë në vit, 500 milionë në 2.5 vjet si futbollist dhe një paketë të përgjithshme prej 1 miliardë eurosh për Kristiano Ronaldon, që do të jetë edhe ambasadori i Arabisë Saudite për Kupën e Botës të vitit 2030. Reagimet ishin të shumta për kalimin e tij zyrtar te Al Nasri, dhe analistët e tifozët patën më së shumti vlerësime negative. Në televizionet e ndryshme, si Skaj Sports, ESPN, nuk u kursyen duke e cilësuar një përfundim të keq të karrierës së tij.

Britanikja “Deili Meil” theksoi se ngjarjet e 2022 ishin që Mesi fitoi Botërorin dhe Ronaldo u largua nga Mançester Junajtidi, e tani edhe nga elita. “Marka” e Madridit shkruajti se Ronaldo priti një telefonatë që nuk arriti kurrë, dhe e kuptoi se nuk luante dot në Champions në Europë. Gjithsesi, “La Gazeta delo Sport” nga Italia theksoi një fakt që ka qenë i vetmi që e ka nxitur portugezin për të braktisur Europën. “Ronaldo kalon Kanelon dhe Mesin, për t’u bërë më i paguari”, – shkruan e përditshmja.

Me 200 milionë euro në sezon, askush nuk mund të krahasohet me Kristianon, të paktën kur vjen puna tek paratë. Kampioni i madh i boksit, Kanelo Alvarez, fiton mbi 85 milionë euro, duke qenë ende njëri nga sportistët më popullorë të botës. Lionel Mesi, kampioni i ri i botës me Argjentinën, arrin në 70 milionë euro në vit, edhe pse nuk është në nivelet e Barcelonës. Gjithsesi, edhe po të kishte mbetur në “Kamp Nou”, argjentinasi do të kishte fituar më pak se Ronaldo. Në këtë renditje nuk mund të harrohet Kilian Mbape, i cili sipas mediave spanjolle dhe franceze fiton 100 milionë euro në sezon, në bazë të rrogës dhe bonuseve të tjerë tek Paris SG.

Sfidanti.al