Kjo traditë ka nisur që në Euro 2016, të paktën. Nën drejtimin e trajnerit Didie Deshamp, futbollistët e kombëtares së Francës kthehen triumfalisht në bazën e tyre pas çdo suksesi. Misioni që nuk u përfundua dot me sukses atëherë në Paris dhe në Klerfonten, shpresohet të realizohet tani, dhe “Blutë” e patën edhe një tjetër parakalim shend e verë pas fitores në çerekfinale të Botërorit ndaj Anglisë. Tifozët francezë natyrshëm që janë të lumtur, ashtu si edhe të përditshmet në vendin e madh europian.

“L’Ekip” lavdëron Olivie Zhirunë për golin që i dha fitoren ekipit në një ndeshje të tensionuar dhe të vështirë deri në fund! “Lë Parizie” e shkruan titullin me fjalën “Po” në anglisht dhe komenton se “blutë e prenë mes dhimbjeve biletën për në gjysmëfinale”! “Lë Mondë”: “Të dominuar, Blutë heqin qafe Anglinë për në gjysmëfinale! Kaluam testin e parë të fortë, tani ndaj Marokut! “Lë Figaro” lavdëron “gjyshat” legjendarë francezë që nuk e humbën takimin me gjysmëfinalen dhe që nuk dorëzohen kurrë!

E qartë që në ishull zotëron dëshpërimi. “Zemrat e luanëve u thyen”, titullon “Deili Mirror”, Kejn humbi penalltinë dhe Franca triumfoi! “Sërish gjithçka mori fund për Anglinë, – komenton “Sandi Tajmsi”, – skenari familjar, ne sërish kthehemi në shtëpi!” Tabloidi “San” (The Sun) shkruan se “3 luanët trima janë jashtë Kupës së Botës! Kapiteni hero humbi penalltinë prej ferri!” “Sandi Ekspres”, pasi komenton për grevat e Krishtlindjeve që sjellin 4 miliardë paundë humbje, shkruan në frengjisht: Mirupafshim Katar!

Gjithsesi, futboll nuk do të thotë vetëm sport dhe ja ku vijnë pamjet e përleshjeve të tifozëve francezë, atyre marokenë dhe policisë në Paris pasi dy ekipet u kualifikuan në gjysmëfinale të Botërorit.

Sfidanti.al