Presidenti Duka  po bëhet si i shtëpisë edhe në median italiane, duke dhënë intervistën e radhës, ku thuhet se paska hapur zemrën, por nuk dihet se cilën nga zemrat.  Ka nga ata që thonë se kur flet në Itali është më i sinqertë se në Shqipëri, madje është në paqe me veten e tij. Ndofta mund të jetë edhe kështu, ngaqë  intervistat që organizon në truallin tonë janë si ndeshjet e  mbaruara qysh para se të fillojnë, ngaqë pyetjet dhe përgjigjet kopsiten nga dora vetë. Prandaj,  duket si një lajm i mirë në në një botë plot finte , kur media dhe presidenti luajnë në pozicionet e veta: njëri pyetjet dhe tjetri përgjigjet….

Edhe pse gazetarët italianë mbahen si “nona” e pyetjeve,  presidenti ynë pati luksin të tregojë dashurinë në rritje për trajnerët italianë, pa treguar (mëkatin  e shenjtë)  frikën e madhe që  t’ia besojë ekipin Kombëtar një trajneri shqiptar. Predikohet se ata janë më profesionalë se tanët, por nuk pranohet publikisht  se  janë edhe më të zot  për të qepur gojën, sidomos kur  në lojën tonë futet djalli, siç ndodhi me Andorrën. Apo kur hoqëm qafe Panuçin. Tek kjo e fundit  ndodhi “mrekullia” :  të dyja palët  luanin që të fitonte  Turqia.

Kjo intervista e fundit e presidentit ka brënda  një lajm të mirë dhe një të keq. Po e fillojmë nga lajmi i keq: e paska hidhëruar shumë Panuçi sepse  paska harruar kusurin e premiove. I vetmi nga italianët,  që kërkon të zhytet thellë tek portofoli i tij.  Kurse lajmi “ i mirë” është se vetë presidenti zbulon se do të jetë Hysaj kapiten dhe merret me mend se ç’fat e pret  Mavrajn. Përsëritet filmi si me Ansi Agollin. Pyetja që nuk bëri gazetari italian : si ka mundësi që lajmin e kapitenit e jep presidenti më parë se vetë trajneri Reja. Ku ta  dinë italianët e medias se bashkatdhetarët e tyre kur janë  në stolin e Kombëtares , kanë një përshtatje aq tjetërsuese.. sa nga Italia s’u mbetet gjë tjetër veç pasaporta . Ndaj thuhet me të madhe se  De Biazi ishte aktori më i mirë nga italianët, kurse Dosena “aktori më i keq” , për të cilin presidenti tha përciptas, gjatë intervistës,  se iku shpejt, aq shpejt dhe aq frikshëm ia mbathi,  sa edhe kur ia përmendin  emrin duket sikur tundet edhe  dosja e tij…

G.Sinemati

Botuar ne Panorama Sport