Spalleti: Jo të gjithë e plrballojnë presionin te Juve

Luçiano Spaleti komentoi fitoren e parë në drejtimin e Juventusit. Ai nisi nga Kopmeiners dhe pozicioni i tij si mbrojtës i djathtë në treshe.

“Doja që Turam të ngrihej më lart dhe kështu ai (Kopmeiners) të futej në mesfushë për të pasur një lojtar më shumë në repartin e mesit. Bëri një ndeshje shumë të mirë nga pikëpamja e vëmendjes dhe komunikimit me shokët e skuadrës. Dhe ishte i rregullt në përballjen me kundërsulmet e rivalëve.”

Trajneri bardhezi më pas analizoi ndeshjen kundër Kremonezes: “Bëmë një pjesë të parë të mirë, edhe pse më pas vuajtëm si në fund të pjesës së parë, ashtu edhe në fillim të së dytës. Por krijuam shumë raste, nuk e di sa herë do të kemi kaq shumë mundësi për të shënuar. Duhet të përmirësohemi para portës.”
Spalletti për “Sky” analizoi edhe vështirësitë e disa lojtarëve: “Ka potencial në këtë skuadër, unë u besoj këtyre lojtarëve. Por madhështia e Juventusit të bën të ndjesh presionin. Nga jashtë gjithçka duket e mrekullueshme, qendra stërvitore, fushat… por kur hyn brenda, nuk është e lehtë për të gjithë të përballojnë nivelin e një klubi kaq të madh. Ka disa lojtarë që e vuajnë këtë. Fitorja na ndihmon të punojmë me më shumë qetësi.”

Së fundmi, ai foli për emocionet e rikthimit në stolin e një klubi: “Përpiqem t’i bëj gjërat mirë për ata që na duan. Jam i përkushtuar. Do të jetë thelbësore të krijoj marrëdhënie të mira me lojtarët, kështu kam bërë gjithmonë. Shpresoj të arrij këtu atë që nuk ia dola plotësisht me kombëtaren… Përmes ndarjes së emocioneve rritemi si skuadër”, përfundoi Spaleti.

Tags: ,