Lionel Mesi nuk ka dëshirë të jetë patjetër një kapiten. Nuk dëshiron të jetë një shembull për të tjerët përveçse me anë të lojës së tij, veçse si çdo yll i madh futbolli nuk i shpëton dot “vëzhgimit me lupë në dorë” nga mediat dhe tifozët. Numri 10 i Barcelonës, gjithsesi, nuk i ka qejf kritikat, dhe besohet se ato e acaruan shumë pas disfatës së rëndë në fushën e Paris SG në Ligën e Kampionëve.

Trajneri i Argjentinës, Bauza, shprehet i bindur se ishte pikërisht një shfrim zemërimi, një reagim i ashpër ndaj kritikave, ai mosfestim i golave nga ana e Mesit në ndeshjen ndaj Leganjesit. Fillimisht, mediat spekulluan duke shkruar se Leo e pati atë sjellje si përgjigje për trajnerin Luis Enrike, por Bauza nuk mendon ashtu. Për fatin e Barcelonës, Mesi e shpreh zemërimin duke shënuar gola, dhe katalanasit shpresojnë që ai të vazhdojë të jetë me nerva kur të luajë këtë fundjavë në fushën e Atletikos së Madridit, për ndeshjen e ligës spanjolle.

Sfidanti.al