Në të vërtetë, pikët janë të barabarta, nga 19, dhe që të dyja skuadrat janë në formë shumë të mirë. Nuk mund të thuash ndryshe për Barcelonën dhe Realin, kur ato kanë nga 6 fitore e një barazim në renditjen e kampionatit, por gjithsesi ndalesa e madrilenëve ndaj Osasunës (1-1) krijoi disa dyshime. Jo se është diçka krejt e pazakonshme, pasi edhe Barça e bëri këtë gjë në javën e parë në “Kamp Nou” ndaj Rajos Vajekanos, por më pas reagoi. Këtë herë ishte radha e ekipit të trajnerit Karlo Ançeloti që të gabonte në “Bernabeu”.

Në një ndeshje me shumë ngjarje, Reali u ndal nga fati i keq dhe nga nervozizmi, ndërsa Karim Benzema nuk po ka fat. Kandidati kryesor për Topin e Artë humbi një penallti duke goditur shtyllën dhe shënoi një gol në pozicion jashtë loje. Këtë sezon e kanë lënë në hije Halandi në Angli dhe Levandovski në Spanjë, pa folur për Mbapenë e Nejmarin në Francë. Ndaj Osasunës, golin e avantazhit e shënoi Vinisius, ndërsa Kike Garsia barazoi në 50’ dhe miqtë rezistuan me 10 lojtarë që nga 78’ kur David Garsia mori karton të kuq. Diferenca e vërtetë për momentin mes dy kryesuesve të La Ligës është në golaverazh, pasi katalansit e kanë +18 (19-1) dhe “merengesit” +11 (18-7). Spikat sidomos mbrojtja e hekurt e ekipit të trajnerit Ksavi Hernandez, sepse sulmi duket thuajse i barabartë.

Sfidanti.al