Ku shkon Nejmar? Nga mosdëshira për lojë, te prishja me trajnerin!

Një investim prej 222 milionë eurosh mund të sjellë mrekullinë, por edhe batërdinë. Tek Paris SG, për momentin, përveç golave, asisteve dhe fitoreve, ardhja e Nejmarit ka shkaktuar edhe shumë probleme. Pas përplasjes me Kavanin për shkak të gjuajtjeve të penalltive dhe goditjeve të dënimit, erdhën lajme për pakënaqësinë e lojtarëve të tjerë për privilegjet e brazilianit, ndërsa tani dalin edhe dy elementë të tjerë.

Së pari, flitet që Nejmar nuk luajti me dashje në ndeshjen e fundit të kampionatit francez, fituar 5-0 ndaj Anzherit, në mënyrë që të ishte në formën e duhur për sfidat e Brazilit ndaj Japonisë dhe Anglisë. Nga PSG-ja u tha se Nejmari ishte i dëmtuar, por sulmuesi nuk pati asnjë problem të stërvitej me kombëtaren e tij.

Së dyti, besohet se raporti i tij me trajnerin Unai Emeri është shumë i keq. Gazeta “Marka” boton foto dhe thotë se lëvizjet e trupit të Nejmarit tregojnë gjithçka. Vëzhgimi i pamjeve filmike dhe fotove tregojnë se Nejmar i thotë trajnerit se nuk ka dëshirë që ta dëgjojë dhe se duhet t’i lerë të qetë lojtarët. Po ashtu, ai i bërtet Emerit kur nuk jep faulla në favor të tij gjatë ndeshjeve përgatitore në stërvitje. Nuk dihet si do të shkojë e ardhmja, por me probleme të tilla, vështirë që PSG të fitojë Championsin.

Sfidanti.al