Tirana, ekipi më i titulluar në historinë e futbollit shqiptar, ndodhet përballë një situate dramatike. Me vetëm katër ndeshje të mbetura deri në fund të sezonit të rregullt, bardheblutë ndodhen në vendin e fundit të klasifikimit.

Pavarësisht polemikave që kanë shoqëruar këtë sezon, problemeve të arbitrimit apo rivalëve që ndoshta nuk kanë qenë gjithmonë korrektë, realiteti është se Tirana, trajneri, lojtarët dhe drejtuesit e klubit mbajnë përgjegjësinë kryesore për këtë situatë. Ky është një dështim i përgjithshëm, dhe tani çdo gabim mund të kushtojë rënien nga kategoria. Në katër ndeshjet e fundit, skuadra e drejtuar nga Bledi Shkëmbi ka arritur vetëm tre barazime dhe një humbje, duke grumbulluar vetëm tre pikë nga 12 të mundshme. Për një ekip që lufton për mbijetesë, ky bilanc është shumë i ulët dhe alarmant.

Sfida e radhës është kundër rivalit historik, Partizanit. Në çdo rrethanë, ky është një duel ku nuk bëhen lëshime. Të kuqtë janë në garë për titull dhe nuk do të lejojnë Tiranën të marrë frymë lirisht. Një humbje në derbi do të ishte një goditje e rëndë për moralin e skuadrës. Pas derbit vjen sfida me Skënderbeun në transfertë. Një tjetër ndeshje e vështirë, përballë një rivali direkt për mbijetesë. Skënderbeu do të luftojë deri në fund për të mos rënë nga kategoria, dhe kjo sfidë do të jetë një finale për të dy ekipet.

Java e parafundit i vendos përballë Teutës, e cila është vetëm dy pikë larg Tiranës dhe ndodhet në një situatë të ngjashme. Duke qenë një nga skuadrat që lufton për mbijetesë, durrsakët do të japin gjithçka për të marrë pikë, duke e bërë këtë ndeshje shumë të vështirë për bardheblutë. Sezoni mbyllet me një tjetër ndeshje vendimtare, këtë herë kundër Dinamos. Edhe pse Dinamo nuk ka pasur një sezon të shkëlqyer, do të kërkojë ta mbyllë kampionatin me një rezultat pozitiv, duke e bërë këtë sfidë edhe më të ndërlikuar për Tiranën.

sfidanti.al