Garën e kanë me rivalët përballë, por deri diku edhe me njëri-tjetrin. Futbollistët shqiptarë në Europë janë në konkurrencë për numrin e golave të shënuar në ligat ku bëjnë pjesë, dhe këtë renditje të veçantë e kryeson Myrto Uzuni. Sulmuesi i kombëtares ka realizuar deri tani 10 herë për Ferencvaroshin në elitën e futbollit hungarez, duke qenë edhe i vetmi nga kuqezinjtë që e ka këtë numër me dy shifra. Edhe pse nuk mund të pretendojë të jetë Këpuca e Artë e Superligës së Hungarisë, sërish shqiptari mund të ngjitet deri në vendin e dytë që e mban Gazdag i Honvedit me 13. Po ashtu, 23-vjeçari beratas mund të fitojë në fund të sezonit një “Këpucë të Artë” simbolike mes lojtarëve të Shqipërisë.

Pas Uzunit janë dy sulmues me nga 9 gola. Armando Broja po shkëlqen në Superligën e Holandës në radhët e Viteshes duke qenë zbulimi i sezonit, dhe një nga lojtarët më të mirë të ekipit. Falë edhe golavë të tij, Viteshe është në vendin e katërt në renditje duke lënë pas Fejënordin e duke pretenduar kualifikimin për në kupat europiane për sezonin e ardhshëm. Gjithashtu, 19-vjeçari është në finalen e Kupës përballë Ajaksit. Rej Manaj është gjithashtu në formë tek Barcelona B, duke shënuar 9 gola në pretendim për t’u ngjitur në Ligën e dytë të Spanjës. Sulmuesi 24-vjeçar ka marrë vlerësime në të kaluarën edhe nga Leo Mesi, dhe mbetet një lojtar në konsideratë të trajnerit të ekipit të parë, Ronald Kuman.

Futbollisti tjetër i dalluar i kombëtares lidhur me tundjen e rrjetës është Eduart Rroca. Mesfushori nga Librazhdi po shkëlqen në sezonin e tij të parë me Istanbulsporin në Ligën e Parë të Turqisë, ku ka shënuar 8 gola e ka shërbyer 12 asistë. Sezonin e ardhshëm ai do të jetë në Superligë, ose me Istanbulsporin, ose duke kaluar në një ekip tjetër.

Sfidanti.al