Këtë herë nuk ishte “Zot shpëto Mbretëreshën”! Himni, të paktën për kombëtaren e futbollit, duhej të ishte “Kejni shpëton Anglinë”, sepse kështu edhe ndodhi në Vollgograd. Kapiteni nuk lejoi që shpikësit e futbollit t’i shtoheshin listës së gjatë të pretendentëve që dështuan në ndeshjet e para në Kupën e Botës. Një futbollist modern, padyshim ndër sulmuesit më të mirë të botës, shënoi të dy golat në një fitore të vuajtur, por aspak të vjedhur të formacionit të trajneri Garet Sauthgejt.

Pjesa e parë, sidomos, ishte e jashtëzakonshme, me Anglinë që nuk u paraqit në fushë me yje, por me lojtarë në formë të shkëlqyer fizike dhe atletike, të bashkuar dhe tepër vertikalë. Rastet pasuan njëri-tjetrin, përpara dhe pas golit të avantazhit shënuar nga Kejn. Lingard, Megajër, Stërling, sërish Megajër, Henderson e sërish Lingard patën raste të pastër dhe nuk u mor vesh sesi nuk shënuan.

Gjithsesi, Angli 2018 do të thotë edhe mungesë përvoje, dhe kjo u pa jo vetëm tek humbja e shanseve për gol, por sidomos te gabimet në mbrojtje. Një i tillë, nga Uolker i Mançester Sitit, i dhuroi Tunizisë penallti në minutën e 33-të. Sasi nuk gaboi dhe u duk se ishullorët do të paguanin edhe një herë naivitetin e tyre.

Ky dyshim sikur u kthye në bindje, kur po në pjesën e parë, Ali, Stërling e Stouns, bënë garë kush e kush të shpërdoronte golin e sigurt. Tunizia u ndihmua edhe nga shtylla, por nuk mundi të shpëtonte deri në fund. Kapiteni Kejn bëri që Anglia ta niste mbarë Botërorin duke pasur tani 3 pikë, po aq sa Belgjika, edhe pse me golaverazh më të dobët.

Sfidanti.al