Elbasani arriti një fitore të rëndësishme në “Elbasan Arena”, duke mposhtur Vllazninë 1-0 dhe duke u ngjitur në krye të klasifikimit me 29 pikë, një më shumë se Egnatia.

Përballja ishte e fortë dhe me raste të shumta para portës, por vendimtar ishte goli i vetëm i pjesës së dytë, pa harrruar faktin që Gjini i Vllaznisë u ndëshkua me kartonin e dytë të verdhë në minutën e 27-të, duke e lënë skuadrën e tij në inferioritet numerik.

Në minutën e 48-të, Loukili shërbeu saktë për Tsague, i cili me një rrotullim të shpejtë mposhti portierin Pohls, duke vendosur rezultatin përfundimtar.

Me këtë fitore, Elbasani konfirmon formën e mirë këtë sezon dhe merr një avantazh të rëndësishëm në garën për titull.

Dinamo arriti një fitore të thellë në transfertë ndaj Flamurtarit, duke triumfuar 3-0 dhe konfirmuar formën e mirë nën drejtimin e Ilir Dajës.

Goli i parë erdhi në minutën e 29-të, kur Lorenco Vila shfrytëzoi një rast të krijuar nga ekipi dhe dërgoi topin në rrjetë, duke i dhënë avantazhin Dinamos që në pjesën e parë. Flamurtari u mundua të reagonte, por tentativat nga Marku dhe Nunes nuk ishin të sakta, ndërsa Maksuti kërkoi penallti në minutën e 3-të, por gjyqtari Lata la lojën të vazhdojë.

Në pjesën e dytë, Dinamo arriti të thellonte avantazhin me golin e dytë në minutën e 77-të. Qefalija shfrytëzoi një pasim nga Bregu dhe mposhti portierin Aleksovski, pavarësisht pretendimeve të Flamurtarit për vendimin e anësorit.

Për ta mbyllur ndeshjen me një rezultat të thellë, James shënoi golin e tretë në minutën e 86-të, duke vulosur triumfin e Dinamos, që me këtë trepikësh shkon në vendin e tretë me 26 pikë, ndërsa Flamurtari rrëshqet në vendin e parafundit, me vetëm 13 pikë.

sfidanti.al