Një luftëtar më shumë për kampionët. Barcelona mori më në fund atë që priste, Arturo Vidali, që përfundoi transferimin nga Bajerni në “Kamp Nou”. Futbollisti i kombëtares së Kilit firmosi kontratë 3-vjeçare, me pagë besohet 9 milionë euro në sezon, dhe ndihet gati.

“Jam i lumtur që jam këtu dhe jam gati të luftoj për të fituar gjithçka, – u shpreh mesfushori kilen, – jam tek Barcelona, skuadra më e mirë e botës, ku luajnë lojtarët më të mirë. Do të jem në krah të Mesit, diçka që nuk mund të ndodhte tek Bajerni”.

Vidali nuk shqetësohet nga dyshimet nëse ai përshtatet me stilin e Barcelonës, ndërsa beson se e rëndësishme është të kesh karakter fitues. Veterani 31-vjeçar vlerësohet si një lojtar tepër luftarak dhe në formë shumë të mirë, pavarësisht moshës jo aq shumë të re. Ai doli edhe në fushën e stadiumit “Kamp Nou”, ku tregoi talentin në përdorimin e topit, si dhe firmosi autografe.

Klubi katalanas bëri kështu një tjetër përforcim të rëndësishëm, pas afrimit të dy brazilianëve, Artur e Malkolm, ndërsa pritet të bëjë një tjetër goditje të madhe. Objektivi i madh i Barçës është Pol Pogba, kampioni i botës me Francën, i cili duket se nuk ka dëshirë të vazhdojë tek Mançester Junajtid, nën drejtimin e Zhoze Murinjos.

Sfidanti.al