Marek Hamshik është vetëm një gol larg rekordit të Diego Maradonës me Napolin, ndonëse do të duhet shumë më tepër për të mbërritur argjentinasin e madh. Kapiteni sllovak i të kaltërve ka shënuar 115 rrjeta deri tani, ndërsa shpresa e tij më e madhe nuk është rekordi i golave, por fitorja e titullit kampion.

“Duhet të fitojmë ndaj Udinezes dhe pastaj ndaj Juventusit në fushën tonë, – tha kapiteni për Radio Kiss Kiss, – duam 6 pikë në këta 180 minuta dhe nëse do të mundnim Juven, do të ishte e mrekullushme. i gjithë Napoli e meriton këtë gëzim”. Napoli e ka fituar titullin kampion vetëm dy herë, që të dyja me Maradonën në përbërje, ndërsa skuadra e Mauricio Sarrit mund të bëjë që pritja 28-vjeçare e tifozëve të marrë fund.

Napolitanët kryesojnë tabelën me 35 pikë, 2 më shumë se Interi dhe 4 më shumë sesa Juventusi kampion. Hamshik ka edhe një premtim nëse fitohet “skudeto”: “Unë kam shumë tatuazhe në trup, por e kam lënë një vend bosh për një tatuazh për titullin”.

Sfidanti.al