Vetëm pak ditë më parë, Matthijs de Ligt dukej vërtet një hap larg veshjes së fanellës së Manchester United, sot gjërat kanë ndryshuar. Negociatat papritmas ngecën, pasi “Djajtë e Kuq” dhe Bayerni i Mynihut nuk ishin në gjendje të arrinin një marrëveshje për çmimin e kartonit të futbollistit holandez. Sipas asaj që raportohet nga “Bild”, klubi anglez ka bërë një ofertë fillestare e cila i është kthyer mbrapsht dërguesit pasi u gjykua se nuk i përmbushte pritshmëritë. Djajtë e Kuq mësohet se kanë ofruar ofruar 30 milionë euro, plus pesë milionë në formën e bonuseve, por për klubin bavarez ishte ofertë shumë e ulët. Siç raporton Bild, De Ligt ka arritur tashmë një marrëveshje me Manchester United disa kohë më parë, por rruga që të çon në tym të bardhë është ende e gjatë. Në fakt, Bayerni e vlerëson çmimin e qendërmbrojtësit holandez të paktën 50 milionë euro dhe kjo është pika fillestare për gjetjen e një marrëveshjeje. Manchester United tashmë ka forcuar mbrojtjen gjatë këtij sesioni të tregut transferues duke siguruar një nga talentët më të mëdhenj në të gjithë skenën e futbollit botëror: Leny Yoro. Për të siguruar qendërmbrojtësin francez 18-vjeçar, “Djajtë e Kuq” derdhën mbi 60 milionë euro në arkat e Lille.

sfidanti.al