Pas katër javësh jashtë fushave për shkak të një dëmtimi në kyçin e këmbës së djathtë, Florian Wirtz, mesfushor i Bayer Leverkusen dhe Gjermanisë, pritet të rikthehet së shpejti. Xabi Alonso, trajner i Leverkusenit, konfirmoi lajmin në një konferencë për shtypin përpara ndeshjes ndaj Heidenheim, e vlefshme për javën e 28-të të Bundesligës.

“Wirtz do të marrë pjesë në një pjesë të vogël të stërvitjes kolektive këtë të premte. Nëse gjithçka shkon mirë, plani është që javën tjetër të jetë plotësisht i integruar në grup”, deklaroi Alonso.

Wirtz, 21 vjeç, u dëmtua në humbjen 0-2 ndaj Werder Bremenit më 8 mars, në javën e 25-të të Bundesligës. Ai pësoi një dëmtim në ligamentin e kyçit të djathtë dhe parashikimet fillestare tregonin për një rikthim në fund të prillit.

“Po rikuperohet më shpejt se sa pritej. Ka punuar shumë fort me ekipin mjekësor. Do të shohim javën tjetër dhe do të flasim sërish për këtë të premten e ardhshme”, shtoi Alonso.

Gjatë mungesës së tij, Bayer Leverkusen u eliminua nga Bayern Munich në fazën e 1/8-ave të UEFA Champions League dhe gjithashtu u eliminua nga Kupa e Gjermanisë, pas humbjes 2-1 ndaj Arminia Bielefeld, një skuadër e kategorisë së tretë.

Xabi Alonso:  Duhet të fokusohemi në kampionat

Duke folur për sfidën kundër Heidenheim, Alonso pranoi se ekipi duhet të reagojë pas eliminimit nga Kupa e Gjermanisë:

“Presim një ndeshje të vështirë, pasi Heidenheim ka një seri të mirë fitoresh dhe po lufton për objektivat e veta. Është e vështirë të pastrosh mendjen pas një disfate kaq të rëndë, por tani duhet të fokusohemi plotësisht në kampionat. Kishim pritshmëri të mëdha për të shkuar në Berlin (finalja e Kupës), por shpresoj që të reagojmë siç bëmë pas eliminimit në Champions League, kur luajtëm mirë ndaj Stuttgartit. Na duhet ajo mentalitet për ndeshjen e nesërme”, u shpreh ai.

Bayer Leverkusen ndodhet aktualisht 6 pikë pas Bayern Munich, kur kanë mbetur 7 javë deri në fundin e Bundesligës.

sfidanti.al