Carlos Alcaraz ka siguruar kualifikimin për ATP Finals 2026, duke u bërë tenisti i tretë që garanton pjesëmarrjen në turneun prestigjioz të fundvitit, pas Jannik Sinner dhe Alexander Zverev, ndërsa spanjolli do të marrë pjesë për të pestin sezon radhazi në turneun që do të zhvillohet në Torino, nga 15 deri më 22 nëntor.

Kualifikimi i tij u bë zyrtar pas përfundimit të US Open 2026, pasi Alcaraz e ka të garantuar përfundimin në 20 vendet e para të renditjes së “ATP Live Race To Turin”. 23-vjeçari po zhvillon një sezon të rëndësishëm, ku fitoi Australian Open, duke kompletuar kështu “Career Grand Slam”, ndërsa triumfoi edhe në Doha dhe arriti në finalen e turneut Masters 1000 në Monte-Carlo.

Sipas të dhënave të ATP-së, Alcaraz ka regjistruar 26 fitore dhe vetëm katër humbje gjatë këtij sezoni. Në US Open, spanjolli u eliminua në çerekfinale nga Ben Shelton, i cili iu imponua vetëm pas një “tie-break”-u në setin vendimtar.

ATP Finals do të jetë një tjetër mundësi për Alcaraz për të synuar trofeun. Spanjolli ka një bilanc prej 7 fitoresh dhe 5 humbjesh në këtë kompeticion, ndërsa sezonin e kaluar arriti për herë të parë në finale, ku u mposht nga Sinner. Pas Alcaraz, Sinner dhe Zverev, në garë për vendet e tjera në turne mbeten Ben Shelton, Flavio Cobolli, Frances Tiafoe, Arthur Fils, Daniil Medvedev, Rafael Jodar dhe Taylor Fritz.