Dinamo i ka dhënë lamtumirën Conference League në mënyrën më të dhimbshme të mundshme. Për të dytin vit radhazi, blutë eliminohen në fazën play-off të kompeticionit, teksa Pafos triumfoi 4-2 pas 120 minutash lojë dhe i dha fund aventurës europiane të skuadrës së Ilir Dajës.

Dinamo e nisi mirë takimin dhe ishte pikërisht skuadra shqiptare që gjeti e para rrugën e rrjetës në pjesën e parë. Avantazhi, megjithatë, zgjati pak, pasi vendasit qipriotë reaguan shpejt duke rikthyer baraspeshën.

Në pjesën e dytë, Pafos kaloi në avantazh, duke e vendosur Dinamon përballë një situate të vështirë. Por blutë nuk u dorëzuan. Në fundin e kohës së rregullt, skuadra e Ilir Dajës gjeti golin e barazimit dhe, duke qenë se takimi i parë në Elbasan kishte përfunduar 1-1, gjithçka u vendos në 30 minutat shtesë.

Dinamo rezistoi deri në fund dhe dukej se po i afrohej një tjetër mundësie për ta vendosur fatin e kualifikimit. Por minutat e fundit rezultuan fatale për blutë.

Pafos shënoi dy gola në fundin e shtesës, duke vulosur fitoren 4-2 dhe eliminimin e Dinamos.

Një fund vërtet i hidhur për blutë, që luftuan deri në sekondat e fundit, por u ndëshkuan pikërisht atëherë kur dukej se gjithçka mund të shkonte drejt një tjetër zgjidhjeje.