Mediat amerikane kanë publikuar renditjen e 50 lojtarëve më të mirë të NBA-së për sezonin e ri 2025-26, ku në krye qëndron ylli serb i Denver Nuggets, Nikola Jokić. Sipas analizës, basketbollisti i dy herë MVP-së ka ruajtur epërsinë ndaj rivalëve falë dominimit absolut në çdo aspekt të lojës. Ai udhëheq një grup të jashtëzakonshëm lojtarësh ku katër vendet e para i përkasin sportistëve jo-amerikanë, dëshmi e ndikimit gjithnjë e më të madh të basketbollit ndërkombëtar në ligën më të fortë të botës. Pas Jokić, në vendin e dytë renditet Luka Dončić (Slloveni, Los Angeles Lakers), i cili pritet të ketë një sezon të shkëlqyer pas përmirësimeve fizike dhe transferimit në një ekip me ambicie titulli. Në podiumin virtual ndodhet edhe Shai Gilgeous-Alexander (Kanada, Oklahoma City Thunder), MVP i sezonit të kaluar, ndërsa Giannis Antetokounmpo (Greqi, Milwaukee Bucks) mbyll katërshen e parë me performanca ende të nivelit elitar. Një tjetër risi e renditjes është përfshirja e Cooper Flagg, talentit të ri amerikan që pritet të bëhet një nga figurat më të rëndësishme të NBA-së në vitet e ardhshme. Lista shihet si një udhërrëfyes i rëndësishëm për ekspertët dhe tifozët, pasi mat jo vetëm statistikat individuale, por edhe ndikimin e lojtarëve në suksesin e skuadrave të tyre. Ky sezon pritet të jetë një nga më të balancuarit e viteve të fundit, me yje ndërkombëtarë që po e çojnë NBA-në në një nivel të ri globalizimi dhe rivaliteti.

sfidanti.al