Jannik Sinner shkruan sërish historinë në tenis. Si një vit më parë, ai është në finalen e US Open dhe të dielën, në orën 20:00, do të mbrojë titullin ndaj rivalit të zakonshëm, Carlos Alcaraz. Në lojë, përveç trofeut prestigjioz amerikan, është edhe vendi i parë në renditjen botërore.

Tenisti italian siguroi biletën për në finalen e madhe pasi mposhti kanadezin Felix Auger-Aliassime, numrin 27 të botës (që nga e hëna do të jetë i 13-ti), në një ndeshje spektakolare që zgjati 3 orë e 21 minuta, me rezultatin 6-1, 3-6, 6-3, 6-4.

Sinner bëhet i katërti në Epokën Open që arrin pesë finale radhazi në turnetë e Grand Slam, pas Federer (10 midis 2005-07, 8 midis 2008-10), Djokovic (6 midis 2015-16, 5 midis 2020-21) dhe Nadal (5 midis 2011-12). Ai është gjithashtu i katërti që arrin finalen e të katër Slameve brenda një sezoni, pas Laver (1969), Federer (2006-07, 2009) dhe Djokovic (2015, 2021, 2023).

Nëse konfirmohet kampion, Sinner do të bëhet i pari që mbron titullin e US Open që nga koha e Roger Federer (pesë tituj radhazi 2004-2008). Për më tepër, finalja Sinner–Alcaraz do të jetë e treta e këtij viti pas Parisit dhe Wimbledonit, një ngjarje që nuk ndodhte që nga viti 1964 (Emerson–Stolle).