Jorginho dhe Catherine Harding pritet të martohen në muajt në vijim, pas një propozimi për martesë që erdhi dhjetorin e vitit të kaluar. Por, pas ngjarjeve të fundit, përdorimi i fjalës “pritet” bëhet i domosdoshëm, pasi çifti, i cili është bashkë që nga viti 2019, është bërë subjekt i tabloideve britanike për një tradhti të supozuar të futbollistit të Arsenal. Kësaj here, protagonist i thashethemeve nuk është 33-vjeçari, por e fejuara e tij, e cila ka shkuar natën vonë në shtëpinë e të dashurës së supozuar për një përballje. Ngjarjet datojnë në fillim të dhjetorit, por janë bërë publike vetëm tani nga personi i prekur drejtpërdrejt, estetistja Vanessa Sandora. “U tmerrova kur dëgjova dikë duke trokitur në derën time natën vonë. Kontrollova videokamerën e derës dhe pashë një grua që nuk e njihja,” tha 39-vjeçarja për gazetën britanike The Sun.

Kjo grua ishte Catherine Harding, këngëtare britanike dhe ish-partnere e aktorit Jude Law, e cila që nga viti 2019 është në një lidhje me mesfushorin Jorginho. “Jam e fejuara e Jorginho, mund të më lejosh të hyj?”, thuhet se i ka thënë Harding vajzës, e cila pranoi për The Sun se kishte pasur një flirt me futbollistin në të kaluarën: “E lashë të hynte dhe patëm një bisedë të sinqertë, si gruaja me gruan. Mendova se meritonte të dinte të vërtetën, kështu që ia thashë.”Duke folur për gazetën, Sandora preferoi të mos zbulonte shumë rreth flirtit të saj të dikurshëm me Jorginho. Ajo pranoi se e kishte takuar futbollistin tre herë disa vite më parë dhe konfirmoi se e kishte bllokuar atë në rrjetet sociale në vitin 2022. “Mendova se ajo histori kishte marrë fund dhe isha e lumtur të vazhdoja me jetën time,” shtoi ajo.

Megjithatë, e kaluara u kthye të trokasë në derën e saj mbrëmjen e 4 dhjetorit. Atë natë, pas orës 23:00, telefoni i Vanessa Sandora filloi të binte. Ishte një numër i panjohur dhe, për shkak të orës së vonë, ajo zgjodhi të mos përgjigjej: “Nuk iu përgjigja, por më pas zbulova se ishte Catherine. Kur nuk iu përgjigja thirrjeve të saj, ajo përshkoi Londrën me makinë dhe trokiti në derën time rreth orës 23:30,” tregoi Vanessa për The Sun. Ish-i dashuri i Vanessa Sandora, që ishte në dijeni të flirtit të saj të mëparshëm me Jorginho, thuhet se kontaktoi Catherine Harding. Dy gratë u përballën dhe u sqaruan, por kjo nuk mjaftoi për të qetësuar Harding: “Nuk jam një grua e pandershme. I thashë se nuk jam e interesuar për burrin e saj. Por që atëherë ajo vazhdon të më dërgojë mesazhe dhe nuk do të heqë dorë. Duhet të vazhdojë përpara dhe të më lërë jashtë jetës së saj,” përfundoi Sandora.

sfidanti.al