Janë pagezuar  bombera meqë  kur “ flasin”  me këmbë, godasin portën dhe tundin rrjetën. Por kur “bomberat”  bëjnë intervistë me njëri – tjetrin, duket  sikur më  pranë është autogoli sesa goli! Pas humbjes për “Gines”  me Gjeorgjinë, ku Kombëtarja dha prova  se ishte “betuar” se  nuk do ta godiste as edhe një herë portën kundërshtare,  kemi ndjekur një intervistë, që i qante me lot rastet dhe  golat e munguar…

I pyetur për ndeshjen nga çunat e ekranit te “qeverisë se topit”, bomberi  Asani ka thënë: “ Ishte një ditë e zezë,  ku munguan dhe rastet për gol..”

Erion Bogdani, ish-bomberi i Kombëtares, në rolin e specialistit në studio, ka replikuar ëmbël me fjalët e tij: “ Asani ti je një futbollist i rëndësishëm për Kombëtaren tonë. Mos thuaj se ishte një ditë e zezë, sepse ju bëtë një ndeshje të mirë..”

S’ka si bëhet me ters me Kombëtaren,  edhe kur ia shprep ndonjëri të vërtetës, nuk të lënë ta hapësh gojën! Kjo që ndodh vlen si haleluja:  një “bomber” pohon se ishte ditë e zezë për kombëtaren, një bomber tjetër, rekordmeni i golave kuqezi,  Bogdani, e zbardhi  ndeshjen  e humbur  dhe produktin e …“qeverisë së topit”!

Sfidanti.al