Anglia tronditet nga “bomba raciste” tek Uest Hemi, nisin hetimet!

Kur një klub futbolli ka një drejtor që merret me transferimet dhe që thotë fjalë jo të përshtatshme nga ana etnike, atëherë ka probleme. Këtë po e provon Uest Hemi, ndërsa në media dhe në opinionin publik është ngritur një stuhi lidhur me deklaratat e njërit prej drejtuesve të klubit, Toni Henri, që ishte shprehur se “nuk duam të marrim lojtarë të tjerë afrikanë sepse na krijojnë probleme, kur lihen jashtë skuadrës”. Uest Hemi e pezulloi menjëherë Henrin nga detyra, ndërsa Federata nisi hetimet.

Gjithçka filloi me një intervistë të ish-lojtarit të Uest Hemit, Diafra Sakho, i cili akuzoi klubin londinez për racizëm. Sakho u largua nga Londra në janar dhe kaloi tek Rena në Francë, ndërsa mediat zbuluan se Henri i kishte dërguar një e-mail një agjenti të një lojtari afrikan, ku shkruante se “nuk duam të marrim lojtarë të tjerë afrikanë sepse na krijojnë probleme, kur lihen jashtë skuadrës”. Henri u detyrua ta pranonte këtë, ndonëse u justifikua se nuk bëhej fjalë për racizëm, por për rregullin e ekipit.

Sakho u përgjigj në rrjetet sociale duke deklaruar se “Uest Hemi gënjen, por e vërteta do të dalë, unë kam besim tek drejtësia”. “Ne afrikanët kemi karakter, ne jemi si luanët dhe ata tremben nga ne”, – theksoi sulmuesi 28-vjeçar i Senegalit. Uest Hemi ka aktualisht 6 lojtarë me origjinë nga Afrika.

Sfidanti.al