Kur luajti për herë të fundit “nën çati”, pra në sallë të mbyllur, pësoi disfatë ndaj Novak Gjokoviçit në Uimbëlldon. Rafael Nadalit iu duk sikur u përsërit gjysmëfinalja e frikshme londineze, ndërsa luajti përballë rusit Kaçanov në turin e tretë në US Open. Në një sfidë të zhvilluar me çati të mbyllur për shkak të reshjeve të shiut, rusi shtatlartë dhe i ri luftoi pikë për pikë me numrin 1 të botës, dhe iu afrua fitores.

Përfundimi ishte 3-1 për Nadalin, por rezultati i seteve flet vetë: 5-7, 7-5, 7-6 (9-7), 7-6 (8-6), ndërsa ndeshja zgjati 4 orë e 23 minuta. Flet vetë edhe pika e fundit që i dha fitoren, të cilën spanjolli e mori vetëm pas 38 goditjeve. Kaçanov është 22 vjeç, 1.98 metra shtatlartë dhe shpreson që të fitojë Grand Sleme, kur “brezi i artë” i tenisit të tërhiqet, apo kur ai të jetë aq i fortë sa të mundë Federerin, Nadalin apo Gjokoviçin.

Sfidanti.al