Milani vazhdon të mbajë ritmin në Serie A, edhe pse rezultatet e fundit nuk kanë qenë gjithmonë bindëse. Barazimi i vuajtur ndaj Romës në “Olimpiko”, që përfundoi 1-1 me golat e De Winter dhe penalltinë e Pellegrinit, ka rikthyer debatet rreth “fatit” të Massimiliano Alegrit dhe mënyrës se si ai po menaxhon skuadrën. Në rrjetet sociale nuk kanë munguar ironitë dhe komentet mbi pikët e fituara apo të humbura, por realiteti është më kompleks.

Milani ka pësuar vetëm një humbje në 22 ndeshjet e fundit, duke ndërtuar një vazhdimësi mbresëlënëse, por diferenca prej pesë pikësh nga Interi kryesues tregon se gara për “Skudeton” po bëhet gjithnjë e më e vështirë. Barazimi me Romën nuk është një rast i izoluar. Ai pasqyron një model të përsëritur: Milani shpesh shkëlqen ndaj skuadrave të mëdha, por has vështirësi për të mbyllur ndeshjet kundër ekipeve të mesme ose më të vogla, duke humbur pikë të çmuara.

Kjo ka ndarë opinionin sportiv në dy kampe: nga njëra anë, ata që vlerësojnë pragmatizmin dhe “ftohtësinë” e Alegrit në momentet kyçe; nga ana tjetër, kritikët që shohin mungesë guximi dhe problemin e vazhdimësisë. Ndeshja ndaj Romës ishte shembull tipik. Milani dominoi për rreth 20 minuta në pjesën e fundit, por nuk arriti të shënojë golin vendimtar, duke lënë hapësirë për barazim. Nga pikëpamja taktike, Alegri vijon të ndjekë një strategji të qartë: menaxhim energjie dhe aktivizim i rezervave në pjesën e dytë, me lojtarë si Pulisic apo Füllkrug, për të ndryshuar ritmin e lojës. Kjo qasje ka funksionuar mirë kundër rivalëve direkt, duke sjellë pikë të rëndësishme, por jo gjithmonë ndaj skuadrave më të mbyllura, ku Milani ka lënë terren.

Statistikat janë të qarta: 21 rezultate pozitive në 22 ndeshje, një seri që e bën Milanin ekipin me ecurinë më të gjatë pa humbje mes pesë ligave kryesore europiane. Ky fakt tregon se nuk bëhet fjalë vetëm për fat, por edhe për menaxhim dhe organizim të fortë nga ana e Alegrit. Çdo pikë e humbur tashmë peshon dyfish. Fat apo meritë, një gjë është e sigurt: Milani ka ndërtuar një stabilitet të rëndësishëm dhe ka konsoliduar pozitat për një vend në Champions League. Por nëse synimi është titulli, përmirësimet – sidomos në ndeshjet “e vogla” – janë të domosdoshme.

sfidanti.al