Këto medalje i kemi të rralla, veçse e shtuam edhe një tjetër. Shqipëria e ka edhe një kampione të Europës, këtë herë në shah, sepse Klean Shuqja triumfoi në turneun e kategorisë Blic për sportistët deri në 16 vjeç. Vajza, që doli kampione e Shqipërisë pak javë më parë, shkëlqeu në Selanik duke marrë 12.5 pikë në 18 ndeshje. Ajo pati 12 fitore, 1 barazim dhe 5 humbje duke lënë pas shahisten gjermane Luiza Bashilina që kishte Elo më të lartë. Shuqja e ka koeficientin ELO në kategorinë Blic 1891, ndërsa Bashilina e ka 2047. Sportistja shqiptare pretendonte për medalje në Europianin e Selanikut, por pas paraqitjes shumë të arriti maksimumin e mundur duke fituar titullin. Një sukses i madh për vetë Kleanin dhe për trajnerin e pasionuar Shkëlqim Çela. Këtë vit, Shuqja u shpall për herë të parë kampione e Shqipërisë duke qenë tepër e re, ndërsa objektivi i radhës është në turneun kryesor të këtij sporti, në Olimpidën Botërore që zhvillohet në Indi nga 28 korriku deri në 10 gusht.

Sfidanti.al