Pas më shumë se 12 vitesh heshtje dhe mister rreth gjendjes së tij shëndetësore, dalin në dritë informacione të reja për Michael Schumacher, legjendë e Formula 1, i cili në vitin 2013 pësoi një aksident tragjik teksa bënte ski. Sipas një reportazhi të publikuar nga Daily Mail, shtatë herë kampioni i botës nuk është më i shtrirë në shtrat dhe tashmë mund të ulet në karrocë invalidi.

Gazetari britanik Jonathan McEvoy raporton se, pas konsultimit me disa burime pranë familjes Schumacher dhe pas vizitës pranë rezidencës së tyre në zonën Las Brisas, afër Andratx-it në Majorka, Schumacher ka shfaqur përmirësime fizike që i lejojnë të lëvizë me karrocë brenda pronave të tij. Megjithatë, ai vazhdon të ketë nevojë për kujdes mjekësor 24 orë në ditë, i ndihmuar nga bashkëshortja e tij Corinna dhe një ekip i specializuar mjekësh. Sipas burimeve të cituara nga mediat britanike, Schumacher “i kupton disa nga gjërat që ndodhin rreth tij, por ndoshta jo të gjitha”. Që prej aksidentit, ish-piloti gjerman nuk është shfaqur asnjëherë në publik, ndërsa prej vitesh spekulohet se komunikimi i tij është shumë i kufizuar.

Aksidenti ndodhi më 29 dhjetor 2013, në Meribel të Francës, kur Schumacher po kalonte pushimet dimërore me familjen. Ai pësoi një traumë të rëndë kraniale me koma, duke iu nënshtruar ndërhyrjeve urgjente kirurgjikale në Grenoble. Në vitin 2014 u transferua në Zvicër, fillimisht në spitalin e Lozanës dhe më pas në shtëpinë familjare. Që prej asaj kohe, informacionet për “Kaiser”-in kanë qenë të pakta dhe të kontrolluara rreptësisht, me burime të besueshme që vijnë vetëm nga rrethi i ngushtë familjar dhe miq të afërt si Jean Todt.

sfidanti.al