Emiljano Vila nuk ka ndërmend t’i japë fund karrierës futbollistike, pavarësisht se ka mbushur 38 vjeç. Mesfushori durrsak duket se ka gjetur skuadrën e re, me të cilën pritet të vijojë të luajë futboll në nivele konkurruese. Sipas informacioneve të bëra publike, Vila është parë duke u stërvitur me ekipin e Sopotit, ndërsa mes palëve është arritur edhe marrëveshja. Zyrtarizimi i bashkëpunimit pritet të bëhet në ditët në vijim.

Bëhet fjalë për një zgjedhje që tërheq vëmendjen, duke parë karrierën e gjatë dhe arritjet e mesfushorit në futbollin shqiptar. Vila ka qenë pjesë e skuadrave të rëndësishme dhe ka koleksionuar një numër të konsiderueshëm trofesh, duke fituar tri herë kampionatin, dy Kupa të Shqipërisë dhe tri Superkupa. Ndërkohë, Sopotit i duhet eksperienca e një futbollisti si Vila për të përmirësuar pozitat në kampionat. Pas tetë javësh në Kategorinë e Parë, skuadra renditet në vendin e 10-të, një pozicion që e mban pranë zonës së rrezikut për rënien nga kategoria.