Nuk është pak t’ia dalësh ndaj një kundërshtari të tillë, aq më tepër kur shpesh të dy mbuluan njëri-tjetrin. Luka Donçiç dhe Janis Adetokumbo patën një duel emocionues në Arenën e Miluokit dhe ylli i Dallasit ishte ai që tha fjalën e fundit. Djaloshi 23-vjeçar nga Sllovenia shënoi 32 pikë, kapi 8 topa në tabela e shërbeu 15 asistë, duke bërë edhe 3 vjedhje topi. Me 15 asistët e tij ishte më i rrezikshmi në fushë duke krijuar pikë të tjera për shokët. Donçiç është një “yll erratik”, një “bukuri e çrregullt” herë pas here, sepse humbi topin 6 herë dhe gaboi disa herë për tri pikë, por inteligjenca e tij është e nivelit më të lartë. Falë “Magjikut Luka” Pauelli shënoi 22 pikë, Bransonin 15, Bulloku 16 dhe Finej-Smith apo Dinuidi nga 11. Dallasi ia doli në fushën e Miluokit 118-112, ndërsa Adetokumbo nuk është se luajti keq. Shënoi 28 pikë, kapi 10 topa në tabela, shërbeu 2 asistë dhe vodhi 2 topa. Gjithsesi, nuk ishte ai i përhershmi, ndërsa Miluoki duhet të forcohet edhe më shumë për të pretenduar të mbrojë titullin.

Sfidanti.al