Ishte seti i dytë në fushën qendrore në “Oll Inglënd Klab” (All England Club), dhe një vajzë 15-vjeçare ishte thuajse e mundur përballë një tenisteje me shumë më tepër përvojë. Kori “Koko” Gof (Gauff) kishte humbur setin e parë 3-6 ndaj sllovenes Polona Hercog, dhe rivalja kishte topin për të fituar ndeshjen, me setin e dytë 5-2 në favor.

Paprituar adoleshentja amerikane “prodhoi” një gjuajtje të habitshme nga “asgjëja” duke fituar pikën, dhe në atë moment, dikush nga tribuna thirri: “Presioni është privilegj”! Nuk dihet nëse kjo batutë theu rekordin botëror të origjinalitetit, por Kori u duk e transformuar. Hercog pati dhe një tjetër top për të mbyllur ndeshjen, kur shifrat ishin 5-4, duke pasur shërbimin në duart e saj, por bëri një gabim të dyfishtë.

Në përfundim, Gof triumfoi në setin e dytë, pas “lojës vendimtare” (taj brejk-tie break) duke fituar 9-7 dhe krejt setin 7-6. Edhe seti i tretë ishte tepër i fortë, por 15-vjeçarja tashmë e kishte mbledhur veten dhe nuk u dorëzua derisa e mbylli 7-5. Gof ia doli pas 2 orësh e 45 minutash, e mbështetur nga 14 000 spektatorë, dhe me praninë e prindërve të saj në tribunën mbretërore. Amerikania nuk është më e reja që arriti në raundin e katërt në Uimbëlldon, pasi Xhenifer Kapriati, Stefi Graf apo Andrea Jeger e bënë më herët se ajo. Gjithsesi, Kori Gof është e veçanta e këtij sezoni, dhe nuk do të dorëzohet lehtë.

Sfidanti.al