Fernando Alonso do të rikthehet në Rally Dakar në vitin 2027 dhe këtë herë do ta bëjë në timonin e një Aston Martin. Lajmi i bujshëm, i raportuar fillimisht nga “Soy Motor” dhe i konfirmuar nga “MARCA”, pritet të bëhet një nga ngjarjet më të rëndësishme të edicionit të ardhshëm të garës më të vështirë të automobilizmit.

Projekti do të jetë i mundur falë kalimit të makinës aktuale Dacia Sandrider, me të cilën Nasser Al-Attiyah fitoi Dakar 2026, në duart e Aston Martin. Makina do të përshtatet me markën britanike dhe do t’i besohet kampionit spanjoll, i cili do të ketë mundësinë të rikthehet në garën e shkretëtirës pas eksperiencës së tij të parë në vitin 2020. Alonso do të ketë sërish në krah Marc Coman si bashkëdrejtues, ndërsa një tjetër emër i madh pritet t’i bashkohet ekipit: Sébastien Loeb. Në projekt mund të përfshihen gjithashtu edhe Nasser Al-Attiyah dhe Lucas Moraes.

Makina që do të drejtojë Alonso pritet të jetë të paktën po aq konkurruese sa Toyota Hilux me të cilën spanjolli garoi në Dakar 2020. Për më tepër, ajo do të ketë një pamje spektakolare, të frymëzuar nga prototipi Dreadnought që Aston Martin ka krijuar për videolojën “Call of Duty”.