Sjellja e turpshme dhe antisportive e pronarit të Panathinaikosit, Dimitris Giannakopoulos, gjatë ndeshjes së dytë të “play off”-it mes ekipit të tij dhe Valencia Basket, mund t’i kushtojë shtrenjtë presidentit të klubit grek, i cili fatkeqësisht është bërë i njohur për qëndrime të tilla të papranueshme. Gjatë ndeshjes ai qëndroi pas stolit të ekipit të tij dhe vazhdimisht ngrihej për të folur me lojtarët, duke i nxitur me miratimin e trajnerit të tij, Ergin Ataman. Megjithatë, në një moment ai kaloi çdo kufi duke iu afruar tavolinës së zyrtarëve për të protestuar ndaj një aksioni, një veprim i paprecedentë dhe plotësisht i dënueshëm.
Qëndrimi i tij provokues ndaj publikut që kishte mbushur plot “Roig Arena”-n, të cilin e sfidoi me gjeste dhe shikime në dy ndeshjet e para të serisë, nuk mori reagim nga tifozët, por bëri që policia të forconte praninë rreth tij. Kjo u denoncua nga trajneri i tij, Ergin Ataman: “Përpara dhomës sonë të zhveshjes ka 10 policë. Ata duan të ndalojnë disa nga stafi ynë teknik dhe presidentin tonë Giannakopoulos. Në 30 vite karrierë, është hera e parë që shoh diçka të tillë. Do të shihemi në Athinë”, deklaroi ai në konferencë për shtyp.
Ndërkohë, Euroliga nuk është e gatshme të tolerojë sjellje kaq të turpshme në kompeticionin e saj si ajo e Dimitris Giannakopoulos, i cili tashmë përballet me sanksione të rënda, pasi është hapur zyrtarisht një procedim ndaj tij. Në “Final Four”-in e kaluar në Abu Dhabi, për incidente të ngjashme ai ishte ndëshkuar nga komiteti disiplinor (një organ i pavarur i Euroligës që merr këto vendime), duke u pezullua me 5 ndeshje pa të drejtë hyrjeje në pallat dhe me një gjobë financiare.
Pritet të paktën një dënim i ngjashëm, nëse jo më i rëndë, për shkak të përsëritjes së sjelljeve. Ai rrezikon të humbasë “Final Four”-in që do të zhvillohet në pallatin madhështor OAKA në Athinë, ku skuadra e tij është organizatore, pavarësisht nëse Panathinaikos kualifikohet apo jo. Kjo mund ta godasë më shumë se një gjobë financiare një person që nuk ka mungesë parash.
Ndërkohë, Pedro Marinez, trajneri i Valencias, u shfaq i indinjuar me sjelljen e bosit grek pas ndeshjes: “Presidenti i tyre është i papranueshëm. Nuk është e pranueshme që Euroliga të lejojë figura të tilla që dëmtojnë sportin, të shkojnë te tavolina e zyrtarëve dhe të përpiqen të ndikojnë. Njerëzit që duan të ndikojnë nga jashtë fushës janë të papranueshëm dhe kjo është sjellje e përsëritur. Euroliga nuk mund të tolerojë njerëz të tillë”, deklaroi Martinez.
Sfidanti.al
