Kanë frikë t’i vënë notën, sepse “mësuesit” nuk vlerësohen,  por presidenti ynë është i vetmi në llojin e vet, madje nuk humbet asnjë rast, qoftë ndeshje zyrtare, qoftë ndeshje miqësore, duke befasuar më shumë se personazhet në fushë. Pas ndeshjes miqësore me Turqinë, kur trajneri Panuçi brofi  në ekran duke përsëritur  “ Ky është futbolli i vërtetë, po,;po, futbolli i vërtetë” apo fraza tjetër e paharruar  “ Grande calcio, grande calcio”, u shfaq presidenti Duka, si dhe herë të tjera, luajti bukur  të pakënaqurin, madje më shumë se aq, si në një lojë që e deshifrojnë vetëm ata që ia dinë stilin alibik. Fjalët e tij kanë hyrë tashmë në muzeun e tejmbushur me qortime “babaxhane”..

“Jam i kënaqur me rezultatin e ekipit dhe me përgatitjen që i bënë ndeshjes dhe atë çfarë dhanë në fushë. Në një ndeshje miqësore është i rëndësishëm eksperimenti teknik dhe nëse merr një fitore, është një kënaqësi më shumë. Duhet të nxjerrim mësime nga gjërat që bëmë keq, për t’i korrigjuar në të ardhmen. Edhe kjo ndeshje nuk ka pasur pak gabime, por shpresojmë të mos i përsërisim më. Nuk duhet të bëjmë gabime amatoreske.” Njëri thotë “Grande calico”, tjetri të huton fare , madje të prish festën kur ta përvesh mu në surrat kur thotë se ka patur gabime amatoreske! Ku ishin këto gabime zoti president? Pse i mban për vete sekretet, do te plasësh ndonjë ditë se janë bërë shumë, kurse  popullin ia dorezon euforisë  dhe gëzohet me ato 3 golat, aq sa dukej sikur Italia kishte humbur Botërorin, ndërsa ne sapo ishim futur në Botërori. Paska patur të drejtë shef Armando, kur disa kohë më parë , i merakosur me naivitetin tone pas një ndeshjeje, nga ato që lexohen keq, ka dalë në përfundimin : “ Na janë bërë shumë  ekspertë që analizojnë ndeshjet..”. Kur nuk e dëgjon të madhin, gabojnë të gjithë, pa shpëtuar dhe vetë Panuçi që nxitohet me këtë bomben “Grande calico” dhe  thirrjen shpirterore “ ishte futboll i vërtetë”. Shkeli në vend të keq, madje sikur kapërceu vijën e verdhë, kur ia lëshoi në fund : “ Kur e kishit mundur ndonjëherë Turqinë? ” Shyqyr Zotit, që nuk dëgjuam një frazë që  italianët e futbollit  e kanë gati për ne:  turqit iu pushtuan për 500 vite në fushën tuaj, kurse ju i pushtuat për.90 minuta..në fushën e tyre.

Gezim Sinemati

Botuar ne gazeten Panorama Sport