Dihet se kur nuk ke ndonjë ekip të madh, dhe nuk ke financa të fuqishme, zgjedhjet që do të bësh do të jenë gjithmonë “gjysmagjel”. Kështu ndodh edhe me trajnerët e kombëtares së Shqipërisë që në 20 vjet kanë kushtuar nja 5 milionë euro (e ndoshta edhe mbi 1 milionë të tjera me Silvinjon), ndërsa suksesin e vetëm të vërtetë e arritëm me De Biazin në Euro 2016. Gjithsesi, ndryshe nga herët e tjera, presidenti i FSHF-së, Armand Duka, u duk shumë më i pasigurt, edhe pse qeshi e bëri shaka gjatë gjithë kohës. Të paktën dy herë ai nxorri nga goja fjalinë se “ne kemi kontratë 18-mujore, por kjo nuk do të thotë se gjithçka është e përfunduar, pasi në futboll çdo gjë varet nga rezultatet”. Edhe pse Duka deklaroi se në zgjedhjen e Silvinjos nuk kishte luajtur rol ana financiare, “gojët e këqija” thonë se paga është e lartë aq sa është ndihmuar edhe nga “ai lart”, që do të thotë nga kryeministri Rama. Të shohim sesi do të jetë Silvinjoja, që energji u duk se kishte me shumicë, por shpresohet të ketë edhe taktin, edhe zgjuarsinë taktike për të arritur diçka të madhe me një skuadër që nuk është aspak e tillë.

Sfidanti.al