Pjesa e dytë e sezonit të Formula 1 ka nisur ashtu sikurse u mbyll e para, me një dominim të makinës McLaren. Dy pilotët e saj u renditën në dy vendet e para pasditen e sotme, me Oscar Piastri që la pas shokun e tij të skuadrës Lando Norris. Për pasojë, australiani ka siguruar “pole position” në pistën e Zandvort, i vlefshëm për garën e Çmimit të Madh të Holandës (e diel, ora 15:00). Ai dha kohën 1’08”662, duke qenë vetëm 12 të mijtat më i shpejtë se britaniku. Në vendin e tretë u rendit “i zoti i shtëpisë”, Max Verstappen me Red Bull, që do të ndajë vijën e dytë të nisjes me surprizën e këtyre provave zyrtare, Isack Hadjar me RB, i katërti. Në vendin e pestë u klasifikua britaniku i Mercedes, George Russell. Zhgënjen Ferrari, në vendet 6-7 me dy pilotët e saj. Charles Leclerc la pas Lewis Hamilton, por dy “kokëkuqet” ishin më shumë se gjysmë sekonde të avashta se McLaren. Në “top-10” edhe Liam Lawson, Carlos Sainz dhe Fernando Alonso.

sfidanti.al