Dikur, kapiteni legjendar detar amerikan Denis Koner, “farkëtoi” pikërisht këtë shprehje. “Ka vetëm një gjë më të bukur sesa fitorja, – tha njeriu që drejtoi ekipin amerikan në garën e jahteve në Kupën e Amerikës, – dhe kjo është të fitosh pasi je duke humbur”. Duket se Koneri e provoi disa herë një ndjenjë të tillë, dhe po kështu duhet të ketë qenë për Barcelonën që u kthye nga buza e greminës për t’u kualifikuar në gjysmëfinalen e Kupës së Mbretit. Në stadiumin e Granadës pësoi 2 gola në 47 minuta dhe ishte pranë humbjes deri në të 88-ën minutë.

Pikërisht, në atë moment nisi mrekullia, kur Grizman shkurtoi diferencën në 1-2 dhe Zhordi Alba barazoi në 90’+2. Barcelona kishte goditur tri herë shtyllën (një herë me Mesin), portieri vendas, Aron u tregua i shkëlqyer duke ndaluar Mesin dhe Arauhon. Në shtesë, katalanasit provuan të fitonin me Grizmanin (100’), por Viko barazoi me penallti në 103’. Gjithsesi, kjo do të ishte rezistenca e fundit e vendasve pasi De Jong në 108’ dhe sërish Zhordi Alba në 113’ fiksuan shifrat 3-2.

Barcelona bëri 36 gjuajtje drejt portës (!!!), nga të cilat 20 në kuadrat, ndërsa 7 dhe 4 që ishin këto shifra për Granadën. Katalanasit patën zotërimin e topit 79 për qind dhanë 1061 pasime (ndaj 294 të vendasve) dhe kornet ishin 18-0, por iu deshën 120 minuta për të fituar, dhe vetëm 2 minutat e fundit për t’i shpëtuar eleminimit. Mesi nuk u duk këtë herë, të paktën jo për golat dhe skuadra e Kumanit po mëson të luajë e të fitojë pa të. Ndoshta po përgatiten për kohën kur ai do të largohet.

Sfidanti.al