Në vitin 2025, fanella më e shitur e futbollit botëror mban emrin e Lamine Yamal. Sipas ‘SportBible’, plot 1,32 milionë persona kanë blerë fanellën e talentit 18-vjeçar të Barcelonës, duke e vendosur atë përpara dy ikonave absolute të epokës moderne: Lionel Messi dhe Cristiano Ronaldo. Messi renditet i dyti me rreth 40 mijë fanella më pak, ndërsa CR7 vetëm në vendin e shtatë, një shenjë e qartë e ndryshimit të brezave.

Suksesi i Yamal nuk është rastësi. Ai ishte protagonist me Spanjën në triumfin europian, shkëlqeu në Champions League dhe iu afrua edhe Topit të Artë. Por ndikimi i tij shkon përtej fushës. Barcelona, e drejtuar aktualisht nga Hansi Flick, ka një aset global të jashtëzakonshëm dhe këtë e tregojnë edhe shifrat: Lewandowski është i treti në renditje, përpara edhe emrave si Mbappé.

Megjithatë, Yamal nuk është thjesht një ‘yll’ futbolli. Ai përfaqëson një model të ri për të rinjtë: spontan, i guximshëm, shpesh në kufijtë e korrektesës politike, por autentik. Ndryshe nga fanella e Messit apo Ronaldos, që simbolizon ëndrrën e superfuqive në fushë, fanella e Yamal përfaqëson një mënyrë jetese: liri, pavarësi, talent i pastër dhe një e ardhme e pafund përpara.

Lamine Yamal nuk është vetëm i pamarkueshëm në fushë, por edhe në treg. Dhe kjo, ndoshta, është shenja më e fortë se një epokë e re ka nisur.