Zgjerimi i pandalshëm i garave nga UEFA dhe FIFA ka transformuar dy kompeticionet më të rëndësishme të futbollit botëror – Champions League dhe Kupën e Botës – në turne gjigantë me respektivisht 36 dhe 48 skuadra. Teorikisht kjo shihet si hap drejt përfshirjes më të gjerë, por praktikisht flet qartë për prioritetin absolut: biznesin. Sidomos kur, pas një faze grupesh me një numër të pafund ndeshjesh, eliminohen vetëm 12 ekipe në Champions dhe 16 në Botëror.

Në aspektin sportiv, e vetmja “anë pozitive” për futbollin italian është se skuadrat e Serie A kanë gjasa shumë të larta të kalojnë të paktën në fazën e playoff-eve, një term që UEFA e përdor për t’i dhënë më shumë peshë një raundi që në thelb është një filtër minimal. Java e fundit e Champions-it pa Interin të pësonte humbjen e dytë radhazi dhe Napolin të mbyllte fazën me tre humbje në gjashtë ndeshje. E megjithatë, zikaltërit janë të sigurt për playoff dhe mund të hyjnë edhe në top-8. Arsenal ka prerë biletën për të tetat, Bayern është aty në 99%, City në 90% dhe PSG në 82%. Real Madrid – i kritikuar në vend, por i frikshëm në Europë – ka 62% gjasa të kualifikohet direkt në të tetat.

Lista e skuadrave që e kanë të sigurt të paktën kalimin në playoff është e gjatë: Liverpool, Atletico Madrid, Barcelona, Atalanta, Inter, Chelsea, Tottenham, Newcastle, Dortmund dhe Sporting Lisbonë. Juventus, Marseille dhe Bayer Leverkusen janë 98% të kualifikuara në playoff dhe ruajnë një shans minimal për top-8. Napoli, ndonëse renditet i 23-ti në klasifikimin unik, ka 80% mundësi të kalojë raundin. Pra, UEFA ofron “parashuta” të mëdha në fazën e parë. Por më pas, në ndeshjet me eliminim direkt, gjithçka ndryshon. E dëshmon sezoni i kaluar, kur tre italianet e kualifikuara për playoff – Atalanta, Juventus dhe Milan – u eliminuan menjëherë. Tifozët shpresojnë që këtë sezon muzika të jetë ndryshe.

sfidanti.al