Kur flitet për Kupan e Botës 2026, Sylvinho mund të konsiderohet si trajneri i vetëm brazilian në pankinën e një kombëtareje europiane, një kontrast i qartë me Brazilin e drejtuar nga Carlo Ancelotti. Ky fakt ka tërhequr vëmendje të madhe në vendin e tij, ku futbolli konsiderohet pjesë thelbësore e identitetit kombëtar.

Në një intervistë ekskluzive për podcast-in e ESPN Brasil, trajneri i Kombëtares Shqiptare ka folur për planet e ekipit dhe për mundësinë historike që Shqipëria ka për të siguruar pjesëmarrjen në Botërorin e ardhshëm.

Kuqezinjtë do të përballen me Poloninë në gjysmëfinalen e ‘playoff’-it, më 26 mars, në Varshavë, një hap kyç drejt Botërorit. Në rast fitoreje, Shqipëria do të luajë më 31 mars finalen vendimtare kundër fituesit të çiftit Ukrainë–Suedi.

Sylvinho thekson se ndeshjet e këtij niveli vendosen nga detajet më të vogla. “Poloninë e njohim mirë, kemi luajtur me ta kohët e fundit. Kanë ndërruar trajner, por lojtarët mbeten të njëjtë dhe të cilësisë së lartë. Ata janë në fazë rindërtimi, ndërsa ne po kalojmë një periudhë zhvillimi. Nuk ka avantazh të dukshëm, gjithçka mund të ndryshoje brenda 90 minutash.”

Në përfundim, trajneri brazilian shprehu besim të plotë te skuadra: “Lojtarët tanë janë mësuar me sfida të forta. Do të mbështetemi te cilësitë tona dhe te puna që kemi bërë deri tani.”

Një përballje e madhe, një mundësi historike dhe një Shqipëri që synon Botërorin, rruga kalon nga Varshava, ku çdo detaj do të jetë vendimtar.