FSHF me një njoftim të befasishëm, komunikoi se pas pak ditësh Shqipëria do të organizojë një “superevent” që në fund del të jetë mbledhja e disa federatave ballkanike në Tiranë, event normal në një vend normal. Sipas shtëpisë së futbollit…pa tifozë, “kjo është një arritje historike”. Në rreshtat propagandistikë, vihet theksi në aftësinë e zv.presidentit të UEFA-s, Armand Duka, si mëkëmbës i Ceferin. Ja komunikata propagandistike:

“Të martën e 16 prillit, në ambientet e “Shtëpisë së Futbollit” në selinë qendrore të FSHF-së, UEFA do të zhvillojë një mbledhje të rëndësishme me pjesëmarrjen e drejtuesve të 11 federatave të futbollit të Europës Juglindore. Pjesë e mbledhjes do të jenë Presidentë dhe Sekretarë të Përgjithshëm të 11 federatave të futbollit të Europës Juglindore: Bosnje-Hercegovina/ Kroacia/ Qipro/ Greqia/ Kosova/ Mali i Zi/ Maqedoni e Veriut/ Serbi/ Slloveni/ Turqi/ Shqipëri. Kjo mbledhje do të drejtohet nga zëvendës-Presidenti i UEFA-s, Armand Duka, ku do të diskutohen disa tema të rëndësishme të strategjisë së UEFA-s për zhvillimin e futbollit europian. Ky është një tjetër event historik që i është besuar Federatës Shqiptare të Futbollit për ta organizuar e që njëkohësisht është një mbështetje për FSHF-në si një partner i besueshëm dhe i aftë të presë aktivitete të nivelit më të lartë ndërkombëtar. UEFA i ka besuar dhe vazhdon t’i besojë FSHF-së organizimin e eventeve me rëndësi, teksa vlen të përmendet mbledhja e komitetit “HatTrick” në shtatorin e vitit 2021, finalja e parë historike e UEFA Conference League në stadiumin “Air Albania” në muajin maj 2022, turnet e shumtë të UEFA-s që organizohen në vendin tonë falë zhvillimit të infrastrukturës sportive, ndërsa në vitin 2025, FSHF-së i është besuar organizimi i finaleve të Kampionatit Europian për grupmoshën U-17 të djemve”.

sfidanti.al