Pas një dite pushim, Partizani pritet të rikthehet sot në aksion për të nisur përgatitjet për ndeshjen e radhës kundër Egnatias, kryesuese e kampionatit dhe ekipi më në formë i momentit. Të kuqtë kanë jo pak probleme para betejës të së shtunës, për shkak të kartonëve të marrë në sfidën derbi kundër Tiranës. Katër lojtarë nuk do të jenë të gatshëm për këtë ndeshje. Gudjufi, Bytyçi dhe Taipi u ndëshkuan me kartonë të kuq, ndërsa Janjeva plotësoi numrin katër të ndëshkimeve me të verdhë dhe është i pezulluar. Në këtë mënyrë, të kuqtë do të kërkojnë për zgjidhje të reja në krahët e mbrojtjes dhe në mesfushë, ku mungon Taipi. Më pak e dhimbshme mungesa e Gudjufit, i cili, që nga ardhja e tij, është konsideruar si lojtar stoli. Në mungesë të Bytyçit dhe Janjevës, mund të shohim një detaj interesant në sfidën kundër Egnatias. Deri më tani trajneri Veselinoviç ka preferuar të luajë me dy qendërmbrojtës të natyralizuar si mbrojtës krahu, por në mungesë të të dyve, me shumë mundësi do të detyrohet të aktivizojë lojtarët natyral në atë rol, Paulo Buxhelaj dhe Anteo Osmanllari. Në mesfushë me shumë mundësi në vend të Taipit pritet të startojë një mes Shanajt dhe Mandos. Gjatë kësaj jave me shumë mundësi skuadrës do t’i bashkohet David Atanaskoski. Sakaq, në stol në ndeshjen e radhës mund të jetë edhe Gjergji Kote. I riu nga Korça në fund të vitit të shkuar ka pësuar një frakturë në gisht dhe rikuperimi ka zgjatur më shumë seç pritej.

sfidanti.al