Ai është një profesionist dhe shkon atje ku nënshkruan kontratat. Zhoze Murinjo nuk është nga ata që preket shumë nga nostalgjia, por gjithsesi një Totenhem-Çelsi është peshë e rëndë edhe për zemrën e tij. Portugezi drejtoi blutë në dy periudha, duke fituar 3 tituj kampion, përveçse kupa të tjera, ndërsa përballë tij do të jetë një nga lojtarët më të mirë që ka drejtuar ndonjëherë, Frenk Lampardi. Ish-mesfushori është sot trajner i Bluve të Londrës, ndërsa Zhoze është në stolin e Totenhemit.

“Unë jam gjithnjë 100 për qind me klubin në të cilin ndodhem, – tha Murinjo në konferencë, – kështu kam qenë gjithnjë, kështu jam edhe tani. Është e pamundur që të kem hapësirë për klubet e mi të mëparshëm. Kam dhënë maksimumin kur kam qenë në klubet e tjerë, kur isha tek Çelsi bëra maksimumin që tifozët të ishin të lumtur, tani bëj maksimumin që të jenë të lumtur tifozët e Totenhemit. Për mua, është e lehtë ta luaj ndeshjen nga ana emocionale, vështirësia është tek fakti se Çelsi është skuadër e fortë”.

Lampardi, nga ana e tij, deklaroi se nuk po përpiqet të jetë një “klon” i Murinjos, shtoi se nuk është duel i tij me portugezin, por kryesorja është ndeshja Totenhem-Çelsi. “E respektoj Murinjon, pati ndikim të madh tek unë, është një trajner i madh, – u shpreh ai, – gjithsesi, duhet të ndeshemi për të fituar. Tifozët tanë duan fitore”.

Sfidanti.al