Ishte madhështore pas suksesit me Uruguajin. E ndjeu edhe trajneri i Francës, Didie Deshamp, i intervistuar gjatë kthimit në hotel. “Fantastike, mendoj se njerëzit po na presin, – i tha ai gazetarit, – Është një kënaqësi e madhe, madje edhe për ju që po më intervistoni, ju po buzëqeshni. Do të jemi këtu edhe për një javë, shpejt vjen ndeshja e radhës”.

Deshamp është motivuesi i madh i favorites për titullin botëror në Rusi, ndonëse kredencialet franceze do të testohen rëndë ndaj Belgjikës. Ja si mendon Antuan Grizmani. “Jemi ndeshur me Belgjikën në Paris dhe kuptuam se çfarë skuadra ishte ajo, – theksoi sulmuesi, – Belgjika ka jo vetëm lojtarë të mëdhenj, por së pari është një skuadër e vërtetë. Ajo luan futboll fantastik. Ndeshja do të jetë tepër e fortë. Objektivi ynë mbetet i njëjti, duam të fitojmë Kupën e Botës, pra duhet të mundim Belgjikën”.

Gjysmëfinale mes dy ekipeve tepër të talentuar, por me një ndryshim. Franca luan mirë kur i duhet, Belgjika përpiqet të luajë bukur gjithnjë. Belgu De Brujn bën analizën e tij. “Franca është një ekip i jashtëzakonshëm, – pranon ylli i Sitit, – Natyrisht, kur je në gjysmëfinale vështirë të kesh kundërshtarë të lehtë, por Franca është tepër e fortë. Ka lojtarë të mëdhenj dhe di të luajë futboll. Diferencat janë shumë të vogla”.

Dy ekipet nuk kanë dëmtime, ndërsa është vetëm një pezullim, Mënier i Belgjikës. Bilanci në total është mië për belgët, por në botërorë Franca i ka fituar të dyja ndeshjet. Fitorja e Francës jepet me kuotën 2.5, suksesi i Belgjikës vlerësohet 2.95, dhe barazimi 3.2. Trajneri Martinez, gjithsesi, nuk trembet.

“Nëse mund Brazilin mund të fitosh ndaj kujtdo, edhe pse Franca sërish është favorite, – u shpreh ai, – Ndaj çdo ekipi tjetër, për të fituar duhet të luash mirë, ndërsa ndaj Brazilit, duhet së pari të kesh besim të patundur se mund të luash mirë dhe se mund të fitosh. Na pret një sfidë shumë e vështirë, por ne kaluam ndeshjen më të vështirë të Botërorit”.

Sfidanti.al