Drejtuesit e Interit u takuan së fundmi me Marco Sommella, agjentin e Ciro Immobiles, për të diskutuar rreth një transferimi të mundshëm gjatë verës për kapitenin e Lazios. Gjërat nuk kanë qenë aq të lehta për 34-vjeçarin italian këtë sezon, i cili pësoi disa dëmtime dhe një rënie të dukshme të formës, duke bërë që të shënojë vetëm gjashtë gola në 25 ndeshje në elitën e futbollit italian. Si rezultat, marrëdhënia e fortë që kishin Lazio dhe Immobile ka filluar të prishet. Ai së fundmi u sulmua dhe u ofendua nga një grup tifozësh teksa ishte jashtë me familjen e tij dhe vuajti edhe më shumë abuzime pasi Valentin Castellanos u fut nga pankina e rezervave për të udhëhequr ekipin drejt fitores ndaj Frosinones.

Gazeta italiane Tuttosport shpjegon në detaje se si një numër agjentësh ishin parë duke hyrë në një hotel në Madrid të mërkurën, duke mbajtur takim me drejtorin sportiv të Interit, Piero Ausilio. Teksa takimi i tij me agjentin e Lautaro Martinez u raportua gjerësisht, një prej takimeve u mbajt i fshehtë. Interi u takua edhe me agjentin Sommella, ku diskutuan rreth mundësisë së transferimit të Immobiles. Zikaltërit po synojnë të përforcojnë fazën e sulmit, pasi e kanë për qëllim që të konkurrojnë në disa fronte, duke përfshirë edhe Kupën e Botës për Klube sezonin e ardhshëm.

sfidanti.al